"مساء الخير، أصدرت رئاسة الجمهورية البيان التالي"

روحوا الجماعة الكل، بدل حوايجو ولبس حوايج القصر، مشا يجري للأورديناتور ويديه تنمّل خاطر قعد ساعة كاملة من غير ما يكونكتي.

حل الاورديناتور فيسع، رما كعبات حمص في فمو، دخل ديراكت للباج فايسبوك متاعو، حط كلمة السر، لغريبة ما تحلش، عاود حطها وشي، اه تذكر اللي هو بدلها توة عندو جمعة، كانت

manich.tartour2013

و بدّلها

mouza.mazmouza

أخيرا تحل الفايسبوك، كان فرحان علّخر،أول مرة يهدد الشعب وهو في تونس، أول مرة يحس روحو عندو هيبة وريشة، تصوّر الشعب الكل بش يلبد ويولي خايف، حس اللي بش تولي الناس تعيطلو سيادة الرئيس، قداش كان شاهيها واحد يقلو سيادتك، كلها كانت تعيطلو منصف ولا صوفة.

حل الفايسبوك، لقا زوز ميساجات، حل لولاني يلقا الشادلي العياري محافظ البنك المركزي باعثلو غناية "للصبر حدود" وكتبلو تحتها : ميرسي منصف على الفازة متاع اليوم، ميسالش، يصير على الرجال

ما حبش يجاوب، ما حب حتى حاجة تطيرلو الفرحة متاعو، فسّخ الميساج، حل الميساج لاخر، يلقاها وحدة من فيمن "والله ما نعري عليك بز...لي غدوة" زادت فرحتو، وزاد حط كعبات حمص في فمو وشرب كاس

... تفجـــــع، ما كانش هذا اللي يتخيلو، لقاها الكل تتطاول على قطر، والكل تتطاول عليه، لبّو العرق، عيط لسمير بن عمر

"ياخي موش قتلي وريهم العين الحمرا تو يتهدّوا، تي هام زادوا هاجو"

تربث سمير، قعد يمسح في الفون دو تان اللي عملو تحت عينيه، واللي جابو من التلفزة مبارح

"منين نعرف انا يا منصف، في بالي كي تحرش اللغة معاهم بش يجيو للثنية، مادام وصلوا باسولك يدّك ما تخافش"

هوما هكاكة ودخلت وحدة لابسة شلاكة : "اسمع ثمة شكون حاشتو بيك"

"شكون"

"منين نعرف انا؟ وحدة قاتلي عديلي المنصف"

"ياخي كوري هوّ، اللي يقلك عديلي تعدّي؟ ياخي ناسية اللي انت في قصر"

ضحكت بالقوي وخرجت من البيت تشلّك

"باهي جيبلي التليفون؟"

"مستانسة نجيبلك التليفون، سيب الفايسبوك وبرة وحدك، حلوة هذي"

قام مشا للتليفون، طيّح في ثنيتو طبق الحمص،

"سيادة الرئيس السيد المنصف المرزوقي، شكون معايا"

" معاك سهام بادي، ما عرفتش صوتي؟"

"سامحني بربي سوسو، دايخ شوية، اليوم عملت مجهود اكثر من العادة، تجي مبعّد نقعدوا في جنينة القصر؟"

"لا ما نجمش، عندي عساس اغتصب فرخة عمرها عامين في روضة، لازم نشوف لحكاية، هيّا تو نطلبك مبعد، بيزو"

علق التليفون، سمير مازال واقف ينحي في الفون دو تان من تحت عينيه .ضربت في مخو فكرة يرجع بيها الهيبة متاعو

"سمير شكون من المستشارين لاهي بالشؤون العكسرية؟"

"ما نعرفش، كثروا عليّ، ما عادش نفرق بيناتهم، علاش تسأل؟"

"موش عندي صلاحية اعلان الحرب؟"

قعد حال فمو، الاكحل اللي تحت عينيه بدا يبياض من قوة المفاجأة "ياخي ناوي تعملها؟"

"لازم نعملها ونرجع هيبتي والناس تولي تحترمني، اناهي الدولة المضعضعة اللي نجم نعلن الحرب عليها"

قعد سمير يخمم، لقيتهااا :"بورما، اي بورما، قالك قاعدين يقتلوا في المسلمين غادي، شفت تصاورهم على الفايسبوك،الناس الكل بش تجي معاك وتولي تحبك، وتولي مدافع على الاسلام وعندك هيبة أكثر حتى من بورقيبة"

"اي والدولة هذي تاعبة؟ عندها جيش قوي؟ ترصيلناش مهنتلين وناكلوا على ريوسنا"

"ما نعرفش، اما من اسمها ظاهرة دولة تاعبة وجيشها تاعب، تو نشوفهالك في الويكيبيديا"

قعد المرزوقي يخمم، ضرب اخماسو في اسداسو، رما كعبت فول في فمو، وخذا رشفة من الكاس، هز تليفونو وبعث ميساج "جنرال حضر روحك"....

"مساء الخير، أصدرت رئاسة الجمهورية البيان التالي...."

حمدي مسيهلي