ما كانش يهضم ياسر اذاعة الزيتونة ولا قناة الزيتونة ولا زيت الزيتونة، مسيكن دوب ما طلع لقى روحو مجبور يسمعها، ما حبش يركز ياسر مع الاذاعة ودار للشباك يخزر لتونس، زبلة ملوحة في كل بلاصة، ساعات تسمع "يعن ... أمك" ولا "تفووه على اللي علمك تسوق"، وكل زوز ميترو نصبة متاع خضرة ولا غلة
جاه صوت التاكسيست "شفت بربي يا خويا اخلاق العباد كيفاش ولات، بن علي وبورقيبة جففوا المنابع اكثر من 50 سنة وهاك تشوف وين وصلنا، سبان وكفر وزنا وعرا، مانعرفش وقتاش بش نرجعوا لربي"
دخل بعضو، ثمة حاجتين يكرههم على الصباح ، الوعظ والارشاد ، ماحبش يطول الهدرة : "الله يهدي ما خلق" وعاود دوّر وجهو للشباك
"بالطبيعة كل شي هداية من الله، اما مادام الشريعة موش مطبقة حكاية فارغة، مادام مناش نتبعوا في القرآن والسنة حالنا موش بش يتصلح، النهضة في عوض تحكم باللي قالوا ربي والنبي قاعدة اتبع في هاك الكفار أيتام فرنسا اللي يحبونا نوليو كيف الدانمارك ولا السويد"
هو هكاكة وتعدات طفلة لابسة بودي لاصق على بدنها وسروال محزوق، عينيه خرجت وعنكوشو دار 180 درجة، هزها وحطها بعينيه وبعد يدا يستغفر "ملا فضايح، هذوما اللي قال عليهم ربي كاسيات عاريات، كيفاش خرجت هكة من دارهم؟"
بدا العصب يمكن فيه، اليوم ماشي يعمل في أونتروتيان وكرايمو مكسرة، عامين بطال اليوم اول نهار يفيق فيه الثمنية متاع الصباح، ما حبش يعمل مشكلة على الصباح، "ربي يهديها"
" ربي يهدينا اجمعين، بوها ما يكون كان ديوث مخليها تخرج هكاكة، مايكون كان تابع هاك الجبهة متاع حمة الهمامي، هذوكم ماو لا اخلاق ولا همة، سمعت قالك ولاد وبنات يرقدوا مع بعضهم اللهم ما عافينا وبعد يتبادلوا البنات، تي شوف حتى مرة شكري بلعيد، المرا تحوس من بلاد لبلاد ومن تلفزة لتلفزة....."
هو هكاكة وقصت عليه كرهبة تسوق فيها مرا "يعن بوك وبو بوك يا بهيمة، شكون الحيوان اللي عطاك البيرمي "
كشاشكو طلعت ونسا اذاعة الزيتونة " في عوض يبقاو في ديارهم يربيو صغارهم يطيبوا حاجة سخونة لرجالهم هاملين في الشوارع، حتى الخدمة شدوها هوما ماعاش نجموا ناكلوا معاهم الخبز"
اذاعة الزيتونة من تونس، يقول رسول الله صلى الله عليه وسلّم .....
من غير ما يخزرلوا قالوا "كان كتب ماشي ندبر في خدمة"
" ربي يسهلك، عملت ماو ركعتين لربّي قبل ما تخرج؟
ماحبش يطول الهدرة " اي صليت الصبح حاضر وعملت اربعة كعبا..اي ركعات "
" يزي خويا لهنا "
طلعلوا الدم لراسو"لا قتلك يزي لهنا بش نهبط، وحاجة تخصني نمّن بربي ولاّ، كان تلهيت في روحك احسن، حقة الاسلام علمنا النظافة، اعمل شوية ديودورون كي تخرج، ولا حتى شوية صابون أخضر"
